Kasabe té ku da na sabe, vez di Nhánha, vez di Nhónhó!

Ah minina boca Port!

Ndjobeu pa bu ser nha pantchola, bu botan um rabada d´odj ta dispresa nha pobreza.

Nprometeu casament nglês bu fazé tchakota di mi,

Na oras minguada, ami na bitchirotcha ta trufudja, bu botan praga pam foga.

Ami xintad na pedra di scola, nha sinta pedj ku tchumau atençan.

Minina fot bu fazen kuza rije!

Nta bem di trabadj na tchada, na kintal di rastandama ku frakeza na boka stang, bu intchin só di trivid, inda bu flam kili ku dimeu.

Ah Ká di Nhánha!

Na kel badj di Santa Cruz ku nha tiston na bolç, ntrau pa badj, bu negam pa bu ba pega ot magnat ngostad na parede.

N` argi pam bai font na turil, maguad ku bu ndjutument, ndixa boket kaprim di mon.

Só pamod di um psiu ku ndau na praça na mei d´alguem, bu ramété na balada bu lomban el trás katch.

Agó gosin bu ta bem ku boka saauu ta tchuman di sinhor. Arneg di bó!!

Kant mi era koitad bu libra di mi, gosin ku nsta letrad bu kré meten ded na odj.

N´nhetch, ami i ka di bu rantch.

Nha djent (…) nhós dan Djarmai si valor!





“Etsa” di Djidjé di Uny.