Karta (ki nunka n'manda) pa nha Kretxeu

Kretxeu,
 

Y ku lagua na odje y kurasan satadjad ki nsta li ta skrebeu algunz palavraz. Palavraz ki nta spera mo ta sirbi pa dau algum konsol, y prinsipalment, pa mostrau kantu nkreu txeu, Kant nsa ta sufri ku bu auzensia.
 

Li, na terá di stranhe, na tera di txeu rikeza, di txeu beleza, uniku sentiment ki ta dispertam y tristeza. Tristeza di vive lonje di bo. Desdi ki nu separa nha vida perde tud sentid. Desdi ki nparti pez aventura nka tem vivid, ntem simplesment subrivivid. Nten subrivivi trokad um kuza: speransa di um dia torna kontra ku bo.Nez nha sobrevivensia djam perde vontad di faze tud kuza. Ku fome na boka stang nka tem vontad di kume. Nez amargura di vida nsta alimenta di speransa.Note nta sabi kama nka tem um sone. Nha konsolansa y sabe mo so nfitxa odje y bu imagem ku ta parce na nha mente.
 

Gosi mas di nunka djam oia mo ki mi y dod na bo kretxeu. Nta pasa dia inter  ta lembra na kez kuza ki nu faze djunt. Ta lembra di prumer vez ku nfurtau um bej, ta lembra di mi xintad traz nhoz kaza ta spreta um xanse di sta ku bo, ta lembra di kez noz pasei na boka lagoa…
 

Nta lembra um dia ki nu ba da um pasei la mar di djam padja so nos doz. Areia staba kent sime lume ma ag staba friu sime jel. Bu deta ku kel bu korpim di sereia sterad na areia, nba tuma banhe nbem modjad nsukudi ag friu di nha kabel dent mei di bu kosta, bu labanta, xatiad, bu tokam diant, nkore pa linga d’ag ndixau pegam, bu da ku mi na txom nu rola, nu nbrasa nforsau um bejim modjad y salgad sime beje di mar na areia… ah kanadja na mund, temp ki bai ka volta! Y ora ki nta fazeu ozga, ki bu ta txipitim!! Ah ka di nhanha!!
 

Lembransa y tant ki o ki ntuma xintid ag ta sprindam di odje, da dam um apert na kurasan ki nta pensa nka ta skapa. Ma ora ku nbem na mi, npensa mo noz doz inda nu tene txeu pa nu vive, mo inda nu tene txeu kuza pa nu faze djunt, mo nu tene  txeu pasei pa nu da djunt, mo ntene txeu beje pam furtau, txeu ozga pam fazeu y mo inda u tene txeu txipiti pou txipitim, nha speransa ta torna renaxse y nta torna ganha forsa pam kontinua ez luta.
 

Kretxeu, sodad y txeu kamim y lonje ma kel kre di mi pa abo y tam grande, tam fort ki ta supera kualker barera. Sime Cesária kanta: "si pa kada vez ku npensa na bo di céu kaiba um strela, di tant pensa na bo céu dja ka tinha mas strela". Djam kre skrebeba tud kel ki nsta xinti nes mumenti li ma ka tem papel na mund ku ta txiga pa kebe tud kel ku sta dent mi. Ma kuma Dioz dja kre, ka ta dura nta sta na bu lad pa nu mata tud es sodad.
 

Kretxeu nunka ka bu duvida di kel ku nta xinti pa bo. Nta prometeu mo nunka nka ta dixau bo so, nta prometeu mo nta fazeu mundjer maz filiz di mund. Sempre ora ku xinti bo so basta bu fitxa odje nta entra na buz pensament. Noz Korp pode sta lonj di kompanher ma nhaz pensament ta sta sempre djunt ku bo y nande ku nbai nta lebau sempre na nha kurasan.
 

Djam kre dispidiba di bo ku mil bej y um ram di flor ma kome distansia ka ta permiti nta prometeu um dia planta um jardim di flor di Anís pa simboliza nha amor eterno pa bo.
 

Di alguem ki so sta na mund pa um kuza: AMAU,
 

Samir (so di bo) Silva