DJARMAI - CRÓNICA III

Fitiçera mansa, mau runha!
Ri ku odj ragalad, di trás dja bu sabé kuzé bu fazé
Dja ka dad conta, Djarmai inter dja sabé
Luz na tchada ta lumiá
Rambóia di sexta fera ku bu staba nel

Bu djobé coitad pa kumé si fidj
Coitad ku nem grit di socor ka tinha força pa daba
Ah fiticera! Minin di djent bu fazé di bó
Ah fitiçera, bu ngoda, bu ngorda bu kumé di bó

Mai ta grita di dor ku grit di mágoa :
Ah nha fidj ku bai fazem um mandad
Ah nha fidj kuzé as fazé ku bó pa bu ka manxé sábado!?

Bó i runha, sem dor bu parcé na casa mort
Xintad ta tira lárimas di krokudil
Sem vergonha ta pega mai na mon: Deus da “djuzé” um bom diskans
Ah fitiçera, um dia ta ngatau na gotcha cert!

Edson Valdir M. Alves