Ilha di Babel

Dja temp kum sta pam screbé kel artige li, ma tud vez kum xinta pam pega nel ta bem um forte emoção ku ta bloquiam por causa di tanta frustração ku es tema ta causam, som comisa na pensa nel nta xinti lágrimas ku ganda cai, nha corasan ta pertam, i nta ser devastad pa um tristeza profunde. Ma nta atxa ma gossi é hora apropria pam screbé i pam pergunta: PAMOD KU DJENTS MAI KA KRE PAPIA KRIOL DI MAI?

Pamod ku sta papiad badiu li na Mai pa pessoas kum tem certeza ma si bai Praia uns 2 vez bai txeu? Pamod ku tcheu emigrants di Mai na Holanda em vez di papia Holandês ta papia sampadjude? Um pessoa prop flam ma kant el era criança al ta pensaba ma ta papiada só sampadjude na Hollanda, pamod emigrants ta binha ta papia só sampadjude.

Na nha último artige n´termina ku frase “um povo sem identidade é um povo sem voz”. Nos língua é um di kes nos identidade social mas forte pamod como Cabo Verdianes, nos sutak e expressões diferentes é kel fator essencial ku ta da cada ilha si prop identidade. Portant si nu ka papia kriol di Mai quem é nos? Mo ku nu ta ser obid si nu tem vergonha di fala nos prop dialete? Mo ku Mai ta bai pa frent si nu ka tem orgulhe di ser Maiense?

Um di kes motive ku djents Mai ta ser vist como “complexad” pa pessoas di ots ilhas é ixatamente pamod nu ka ta kre papia nos kriol hora ku nu sta ku djents di ot ilha, sempre nu ta submité à es i fala sis língua pás podé “intendend midjor”, pamod kus ka ta fala nos língua pa nu intendés midjor também?

Djam teve privilégio di viaja tcheu, morrá na tcheu lugares diferente, i djam convivé ku pessoas di tud ilha di Cabo Verde, mas nunca n´dixá di fala Mai i nu intendé companher sem nenhum problema. Mesme alguns pessoas di ot ilha dja costuma perguntam pamod ku djents Mai ka ta papia simé mi, pamod ku djents Mai ta papia badiu?

Bom, eis a questão. Ma na nha opinião nta atxa ma pove Maiense dja poi na cabeça ma kel kau li é “ka nada” ku nu tené vergonha papia kriol di li pa nu ka ser considerad di “nada” também. Ma nu tem ku pensa ma ser “nada” é ka associa ku bu identidade própria, ser “nada” é copia em vez di tem coragem di ser kel ki bó é. Kel noção di “nada” li sta apenas na nos mente, i el é um di kes barreras ku sta impidi pa nos ilha midjorá. Kre ou ka kre nos e di li dje e nu ta morré Maienses, terra di nos djents, terra di nos pais, portant pamod ka honra memória di nos antepassades?

Mesme kes pessoas ku nu ta fla ma é nos “representantes” ka sta papia kriol di Mai, kili é um di kes situação kum ka sabé sim debé ri ou txora. Mo ku bu podé representa um pove si bu ka ta identifica 100% ku kel pove, ou seja papia simé kel pove? Mo ku bu ta fla ma bu tem orgulhe di ser Maiense si bu ka kre papia simé um verdader Maiense? Kela simplesmente ka ta funciona.

Si nu odja, li na Mai tem tcheu pessoas di ot ilhas ku dja dura ta morra li ma nunca es ta dixa di papia sis kriol, enton pamod anos só bai Praia ou S. Vicent, as vezes só pa um semana, ta bem ta papia sis kriol? Alguém splikam pamod kel kuza la simplesment nka ta entendé.

Quadre formad Maiense é um grup ku ta causan txeu frustação, txeu di nos só tem um padaçe di papel ku ta fla ma nu ba xintá num escola kualker i tem resultad satisfatório na uns testes pa lá, as ta atxa superior pa papia kriol di Mai. Ma es ta diskiçe ki si gossi es sta na patamar di sucess, graças à pessoas dili ou seja sis mãe, pai, avó etc., ku ta papia kriol di li, portant kem é bó pa xinti kualker tip di superioridade i ka papia Djarmai?

Si nu continua ku kel kuza di ka papia nos kriol, dili uns temp el ta ser perdid na temp, i nu ta perdé nos identidade di vez, la dje nunca mas nu ka ta ser obid ou respetad pamod nu ta ser apenas um pove di imitasan i complex, nu ta ser um pove sem voz, sem orgulhe e sem dignidade.

Renato Cardoso, na si música legendária “Terra bo sabê”, fla “terra bo sabé k mestid um X tant pa cada homem vivé simé djent”. Embora kel “X” Cardoso kre flaba mas coisas materiais, li na Mai kel “X” ku nu mesté pa nu vive simé djent é TER ORGOLHE DI NOS MESME, TER FÉ NA NOS CAPACIDADE DI MIDJORÁ KUZAS, PRESERVA NOS IDENTIDADE, PAPIA NOS KRIOL SAB, KEL KRIOL DI INSPIRASAN, TEM KRIOL DI MORABEZA, KRIOL DI NOS DJARMAI.

Hélida Kaline Costa