Perdan

Rodiad pa es bu brisa calorose,
baxe di olhar radiant di bu céu
ku som di bu melodia na nha obid,
nha coração ta txora pa bó.
Mesme ku nha pé finkad na bu txom,
n´tem sodad di bó,
di bu elegância,
kel bu comforte na nha infância,
calor di bu alma,
bu sorriso,
bu pove.

Kel pove ku era di minis di pé
ruse ta brinca na nots di lua cheia .
Pove ku era di mudjers ku tud sis
alegria ta preparaba kes catxupada,
i di homes ku era impenhad na sis rabecada.
Kel pove ku sempre bu das tud bu amor,
gossi es sta da princípios
políticos mas valor di ku bu clamor.
Bu pove gossi tené vergonha bu pobreza,
Bu pove sta dispreza bu morabeza
Bu pove ka kre fala mo ku bu inxinas
Bu pove ka kre mas xintá na bu ragáss
Bu pove sta intxi di arrogância kus sta atxau
insignificante dimas pa sis inteligência
Bu pove embora revoltad, sta continua calade.

Tcheu ingratidan,
Nha Terra de facto nu mesté poi zuedje
na txom e pidiu perdan,
nu mesté lebá à trone di Deus txoba di orasan
ku pal djudand tirau des situasan.
Situasan difícil,
ma ka impossível
Situasan dolorose,
Ma si nu djudau ku tud nos amor
bu ta ser um strela ainda mas brilhante
na mei di Atlântico.
Si pa um minute nu poi nos orgulhe na txom,
nu ta odjá ma bu mesté pa nu dau mon.
Si nu uni come um pove, sem ser cegad
pa interesse di partide A e B,
n´tem certeza ma bu ta ergui
simé kel verdadera rainha ku bó é.


Hélida K. Costa